Festival de Teatro Intercentros

O Equipo de Dinamización da Lingua Galega coordina as propostas do grupo de teatro do centro, conformado por alumnas e alumnos de 5º e 6º de Primaria.

Representaron, na XXVIII edición do Festival de Teatro Incercentros, a obra orixinal Caso 21. Departamento medioambiental. Unha montaxe que nos fai reflexionar sobre a importantcia do coidado da contorna natural e do papel de quen a habitamos.

O alumnado e as persoas asistentes gozaron moito coa escenificación!

Parabéns para elas e eles e para o seu director e guionista, Alberto Martínez, tamén membro do EDLG. 

 

Rota por Compostela

Para festexar o Día das Letras Galegas, o Equipo de Biblioteca e o EDLG, participaron nunha rota por Compostela, con alumnado e familias, que rematou na Biblioteca América. Alí, Mabela Casal, directora da Biblioteca Universitaria da USC, amosounos as asombrosas instalacións, onde puidemos achegarnos ao facsímile do libro máis antigo de Galicia, o Libro das Horas de Fernando I, datado de 1055 e que se atesoura nesta Biblioteca.

Letras Galegas

O Equipo de Dinamización da Lingua Galega coordinou, durante a semana das Letras Galegas, unha iniciativa que agromou nas sesións do obradoiro de poesía creativa, que se desenvolve no noso centro nas xornadas dos venres creativos (Polos creativos - Equipo de Plan Dixital). Esta proposta vén da man do alumnado de 5º e 6º de Primaria, alumnado colaborador dos obradoiros e o do grupo que conformou o Equipo 21.

Quixeron achegarse a Luísa Villalta e á súa obra Ruído, centrándose naqueles versos que consideraron que levaron a autora a pórlle ese título.

Premede na imaxe ou accedede a través do código QR, para escoitar o alumnado.  

O Gran Xogo das Letras

O alumnado do noso centro foi convidado pola Biblioteca Pública de Santiago Ánxel Casal, a participar no o Gran Xogo das Letras Galegas, unha proposta a cargo de Eduvía. Un xogo por equipos no que un grupo de 25 nenas e nenos de 6º de Primaria, tiveron que superar diversas probas mentres se achegaron a Luísa Villalta e aprenderon moitos datos curiosos sobre as Letras.

 

 

Encontros lectores

O 24 de abril participamos, co Equipo de Biblioteca e coas familias, dun novo encontro lector.

Esta vez o club de primeiras lecturas achegouse a Os vagalumes de Marí. Alba Míguez e Damián Gómez, autora e autor desta historia gráfica, editada por Xerais, estiveron no noso centro. Familias e alumnado gozaron moito escoitando como narraban este relato de banda deseñada, como explicaban os detalles sobre desenvolver e repartir un traballo conxunto e insistiron na importancia do debuxo e da pintura nesta historia.

As alumnas e os alumnos que asistiron non perderon a oportunidade de levar as sinaturas de Alba e Damián nas súas mans.

 

Visita ao SNL da USC

O alumnado de 5º e 6º de Primaria do noso centro foi recibido polas persoas responsables do Servizo de Normalización Lingüística da Universidade de Santiago de Compostela.

Un grupo de nenos e nenas estivo presentándolles a nosa campaña Fai un trato co galego! e achegoulles uns adhesivos, que puxeron nas súas portas.

Manuel N. Singala, Xusto Rodríguez e Manuel Bermúdez interesáronse polo traballo que levamos a cabo no centro, pola opinión que a nosa iniciativa lles merecía e a súa utilidade.

Ademais agasalláronnos cunhas bolsas dunha campaña deste Servizo: Témoslle LEI