Nestes días presentamos, ás aulas do noso centro, a tradición oral que recollemos das familias, relacionada con estas datas.
Este curso pretendemos elaborar un novo Libro da Memoria, tendo en conta que estamos a recibir novas achegas das familias de textos poéticos de tradición oral.
Premede na imaxe para acceder ao vídeo.
Esta vez, o manual que elaboremos, incluirá os textos en linguaxe pictográfica (ARASAAC e/ou pictogramas de lectura fácil), tal como se amosan nesta entrada.
A pasada semana presentamos no centro o programa 21 días co galego e +, promovido pola Secretaría Xeral de Política Lingüística. Nesta sexta edición participan por primeira vez centros só de Educación Infantil e Primaria. Seremos dez escolas en total de toda Galicia, o que é unha honra!
Despois dunha primeira sesión formativa e informativa das persoas que coordinamos os Equipos de Dinamización da Lingua Galega nos centros, con Pilar Ponte e Roxelio García que, á súa vez, coordinan o programa, teremos unha xuntanza presencial na nosa escola con todo o claustro, o día 2 de novembro.
Mentres achegamos un resumo da información que recibimos. Só tedes que premer na imaxe.
O traballo que o EDLG, realizou a través do Programa Donas de Si (Proxecta +), levounos a elaborar unha baralla de cartas e un xogo de memoria, para poñer a proba os nosos coñecementos sobre as Mulleres
Imprescincibles ás que nos achegamos e, sobre todo, para divertirnos xogando. Estes materiais
foron elaborados a partir do que descubrimos e aprendemos sobre as nosas
grandes mulleres.
Este curso, cada nivel do noso centro, terá á súa disposición cadanseu xogo. Será unha das iniciativas que estamos a poñer en marcha para participar no Proxecto de innovación educativa en dinamización lingüística, cuxa solicitude presentamos hai unhas semanas.
De novo, máis artistas musicais, se unen á nosa campaña, Fai un trato co galego.
Adhara é a vocalista do grupo Adhara & Ritman. É unha muller comprometida coa lingua e coa cultura galega, que ten colaborado co noso alumnado en varias ocasións e que puxo música e voz ás nosas campañas do 25 N e do 8M.
A súa música mestura diferentes estilos, como o reggae, se ben a súa base é folk
rock. Adoitan adaptar textos de cancións populares galegas, botan man de versos de
Rosalía de Castro, por exemplo, pero tamén poñen voz e música a textos propios.
Paco Nogueiras é un home polifacético, que desenvolve o seu traballo en galego. Formouse con grandes artistas como Andrés Pazos ou Fabio Mangolini, e pertenceu a grandes grupos como Els Comediants, Os Quinquilláns, Ophiusa, Os Tres TENedORES ou a Orquestra Os Modernos. Impartiu e imparte clases de teatro, foi creador de bandas
sonoras...
Aos seus espectáculos “Brinca Vai!” e “Radio Bulebule”, outorgóuselles os Premios Martín Códax da Música na categoría de Música Infantil nos anos 2016 e 2021, respectivamente.
Co seu traballo “Extra!” baseados nos libros editados coa Editorial
Kalandraka, visitou o noso centro.
Xiana Lastra é a vocalista da formación feminina A banda da Loba. Nas súas cancións falan de memoria, de diversidade, feminismo, igualdade, ecoloxismo... Mesturan pop, blues, folk ou rock con sons tradicionais, creando así un estilo propio, que en 2018 gañou o certame aRi[t]mar de música galego portuguesa.
Como moitas e moitos artistas, Xiana, desenvolve moitos traballos así, traballa en Nova Escola Galega (asociación pedagóxica) e ten unha produtora audiovisual e musical, Seispés Producións Creativas. Ela é a "manager" de A Banda da Loba e doutras agrupacións.
Pablo Díaz é unha das persoas máis coñecidas no mundo da música e o baile tradicional galego
Publicou varios Libro-Discos, dos que botamos man nas escolas, entre outros: Tic, Tac, Toc, Toc, Coas miñas mans(galardoado co Premio Martín Códax da Música ao mellor álbum de música infantil no 2017)
Ten participado tamén noutros proxectos musicais como “Música na escola” ou “Música e movemento”. Colaborou con artistas como Xoán Curiel, Magín Blanco ou Ses.