Visita das Mulleres Imprescindibles ao noso centro

No mes de marzo,  o "mes por excelencia das mulleres", visitaron o noso centro para reunirse co alumnado dos diferentes niveis: Marisa Vidal, Encarna Otero, Helena Villar e Margarita Ledo.

Estes encontros con mulleres organizounos o  Equipo de Dinamización da Lingua Galega do noso centro, que está a coordinar a proposta MULLERES IMPRESCINDIBLES NA VIDA DE COMPOSTELA, que se desenvolve a partir do Programa Donas de Si, no que  estamos a participar.

Tivemos a sorte de poder contar para a conmemoración do 8M con Helena Villar e Encarna Otero que desenvolveron, como en tantas ocasións, encontros co alumnado de todos os ciclos. Ademais, e en colaboración co Equipo de Extraescolares, visitounos Marisa Vidal, que nos acercou a Exeria, un dos referentes femininos da nosa historia, a través do seu traballo: Eu son Exeria.

E rematamos o mes coa conferencia de Margarita Ledo, que lle achegou ao alumnado de 6ºde Primaria, a súa paixón polo audiovisual como medio para reivindicar a loita das mulleres e poñer en valor a lingua propia.

Helena Villar Janeiro e Encarna Otero Cepeda

 

 

Marisa Vidal Collazo

 

Margarita Ledo Andión

Mulleres Imprescindibles na vida de Compostela II

 

Hai moitas MULLERES IMPRESCINDIBLES NA VIDA DE COMPOSTELA. Este curso achegámonos a algunhas delas a través da proposta que presentamos para o Programa Donas de Si que está a coordinar o noso EDLG e agardamos dar a coñecer a moitas máis nos vindeiros cursos.

Algunhas desas mulleres xa forman parte da vida activa do noso centro e colaboran con nós cada curso en distintas propostas. Este ano dúas delas, Helena Villar e Encarna Otero, estarán no centro o 8 de marzo e Margarita Ledo, uns días despois.

Para dalas a coñecer ao noso alumnado e ao resto da nosa comunidade educativa, desde o  o Equipo de Dinamización da Lingua Galega, elaboramos unhas infografías. Para a súa realización contamos coa colaboración das alumnas: Celia Lorenzo, Lucía Vieito e Esperanza Viveiro, de 6º de Educación Primaria, coa axuda inestimable da alumna do Grao de Educación Infantil da USC, Cristina Filgueira.