Encontros lectores

O 24 de abril participamos, co Equipo de Biblioteca e coas familias, dun novo encontro lector.

Esta vez o club de primeiras lecturas achegouse a Os vagalumes de Marí. Alba Míguez e Damián Gómez, autora e autor desta historia gráfica, editada por Xerais, estiveron no noso centro. Familias e alumnado gozaron moito escoitando como narraban este relato de banda deseñada, como explicaban os detalles sobre desenvolver e repartir un traballo conxunto e insistiron na importancia do debuxo e da pintura nesta historia.

As alumnas e os alumnos que asistiron non perderon a oportunidade de levar as sinaturas de Alba e Damián nas súas mans.

 

Visita ao SNL da USC

O alumnado de 5º e 6º de Primaria do noso centro foi recibido polas persoas responsables do Servizo de Normalización Lingüística da Universidade de Santiago de Compostela.

Un grupo de nenos e nenas estivo presentándolles a nosa campaña Fai un trato co galego! e achegoulles uns adhesivos, que puxeron nas súas portas.

Manuel N. Singala, Xusto Rodríguez e Manuel Bermúdez interesáronse polo traballo que levamos a cabo no centro, pola opinión que a nosa iniciativa lles merecía e a súa utilidade.

Ademais agasalláronnos cunhas bolsas dunha campaña deste Servizo: Témoslle LEI 

 

Encontro coa alcaldesa de Santiago

Para o desenvolvemento da terceira fase da nosa proposta para o Proxecto de innovación educativa en dinamización lingüística (Fai un trato co galego! Atende en galego!), reunímonos a pasada semana no Pazo de Raxoi con Goretti Sanmartín. A alcaldesa,  recibiu o alumnado de 5º e 6º de Primaria e unha representación do EDLG, manifestando o seu apoio a esta campaña!

 

Estamos moi contentas e moi contentos que dera conta da nosa proposta o Consello da Cultura Galega, o Observatorio da Lingua Galega e xornais como  Nós Diario ou La Voz de Galicia.

Ademais o EDLG do CEIP López Ferreiro creou unha conta de Instagram: @edlglopezferreiro. Nesta conta estanse a subir os apoios das familias do alumnado do Equipo 21 e doutras persoas significativas que colaboran, desde os seus inicios, hai dous cursos, coa nosa campaña Fai un trato co galego!

Animámosvos a sumarvos a esta iniciativa remitíndonos os vosos vídeos ao correo electrónico do EDLG: edlglopezferreiro@gmail.com. O Concello de Santiago xa o está a facer!

Recital na Biblioteca Ánxel Casal

Como cada trimestre, as aulas Coralia e Maruxa do CEIP López Ferreiro, reúnense coa Aula de Maiores da Biblioteca Pública de Santiago Ánxel Casal, para desenvolver unha proposta conxunta.

Esta vez foi un "recital" de cancións populares: "Foliada de Nadela", "Catro vellos mariñeiros", "A Virxe de Guadalupe", " O sancristán de Coímbra" e "Se chove, deixa chover".

Unha vez máis queren pór en valor a cultura propia e a relevancia das propostas de aprendizaxe servizo.

Achegamos o cartel anunciador e un pequeno fragmento do recital.

 

 

 

 

 

 

 

 

 

 

Textos importantes da nosa memoria

O alumnado do noso centro traballa con textos de tradición oral desde Educación Infantil.

Esta vez, o alumnado de 5º e 6º de Primaria, quixo recoller ditos e achegarllos ao resto do centro. Foi unha iniciativa que presentaron durante o programa 21 días co galego e máis 2024 que loce nos nosos corredores.

Agradecemos de novo o traballo de Cristina Filgueira Martínez, alumna do Prácticum II do Grao en Mestra de Educación Infantil, que se encargou da montaxe.

 

Palabras de Muller

Os corredores do CEIP López Ferreiro poñen en valor as palabras das "mulleres galegas imprescindibles" que dan nome as súas aulas.

Este traballo foi desenvolvido polas alumnas e alumnos de 5º e 6º de Primaria que conformaron o "Equipo 21", e que foron os encargados e encargadas de levar a cabo a maioría das propostas da nosa participación no programa 21 días co galego e +. Moitas desas actividades deixarán pegada todo o curso.

Agradecemos tamén o traballo de Cristina Filgueira Martínez, alumna do Prácticum II do Grao en Mestra de Educación Infantil, que se encargou da montaxe.

8M con Caamaño e Ameixeiras

O López Ferreiro conmemorou o 8M, coa actuación do dúo galego de música folk tradicional galega Caamaño & Ameixeiras. Coa acordeonista Sabela e coa violista e vocalista Antía, celebramos o Día Internacional das Mulleres, unha xornada para reivindicar a igualdade e facer balance sobre a situación das mulleres na nosa sociedade.

Este concerto, organizado polo EDLG do noso centro, desenvolveuse grazas á iniciativa dos Contratos-programa Inclúe (CPInclúe), nos que estamos a participar, concretamente do IGUÁLA-T.

 

 

Premede nos vídeos para escoitar un anaco da súa actuación.