Revista Pegada 21

 Este ano, ao igual que o pasado, realizamos a revista en formato dixital e nela achegamos as “pegadas” máis relevantes deste curso.

Boas vacacións!

Preme no seguinte enlace:

Revista Pegada 21

Castelao 3.0 Galiza no cora

Co gallo do 75 aniversario do pasamento de Castelao, un guionista fixo a obra culme dun dos personaxes máis importantes da nosa historia. A multinacional Netflix está interesada en filmala e decide darlle un toque máis... actual. Que podería saír mal? Ou ben?

Representación teatral do alumnado de 5º e 6º do CEIP López Ferreiro polo Festival Intercentros 2025 no Teatro Principal de Santiago.

«Agora Cantamos Nós!», festa grande galego-portuguesa en prol das Letras Galegas Universais

Máis de cinco horas de festa con inesgotable enerxía, tal e como amosou o alumnado das escolas galegas e portuguesas que engaiolou este venres 23 de maio no Parque Eugenio Granell de Santiago de Compostela co seu bo facer nos escenarios compartidos. Alí escoitamos por exemplo a «Muiñeira de Arganzón», «Xota de Arganzón», «Regueifa de San Salvador», «Regueifa do Banquete», «Muiñeira Corrida» ou «Tataravoa» entre moitas outras pezas.

‘Ferreiriñas’, ‘Barri-Kreo’, ‘As tres cordas’, ‘Os Clementinos’… son algúns dos grupos infantís e xuvenís que participaron nesta foliada, á que acudiu o noso centro.

Tamén tivo relevancia a presenza dos “tesouros vivos”, esas persoas que posúen un coñecemento profundo e significativo dunha cultura ou tradición, e cuxa experiencia é fundamental para preservar e transmitir ese coñecemento ás xeracións futuras.

E un bo exemplo foi Teresa dos Cucos, cantareira galega de Malpica de Bergantiños e figura destacada na preservación e transmisión da música e tradición oral galega. Recoñecida influencia e colaboradora de músicos e grupos como Xabier Díaz, Sés, Mercedes Peón, Xurxo Souto e Tanxugueiras, Teresa é toda unha “Mestra da Memoria”, tal e como a galardoou a Asociación de Escritoras e Escritores en Lingua Galega (AELG).

Ao evento asistiron tamén representantes das institucións que apoian esta iniciativa. Por parte do Concello de Santiago de Compostela estivo a concelleira Pilar Lueiro: “O noso concello vibra día a día coa nosa música tradicional, Compostela non se entende sen foliada”, gabou. Desde a Xunta de Galicia asistiron o secretario Xeral da Lingua, Valentín García e o director xeral de Patrimonio, Ángel Miramontes, que destacaron o traballo de Ponte… nas ondas! no reforzo dos lazos coa lusofonía. A presidenta do Consello da Cultura Galega, Rosario Álvarez, falou tamén da importancia da reivindicación do patrimonio oral galego-portugués. Do mesmo xeito que a deputada Sol Agra Tuñas, da área de Cultura e Lingua da Deputación da Coruña, quen tamén salientou a oportunidade e o valor de divulgar e transmitir este patrimonio compartido ás novas xeracións, tan de relevancia este mes ao abeiro da homenaxe ás cantareiras nas Letras Galegas 2025.

Fonte: pontenasondas.org

Placas de textos cantados de Tradición Oral

As familias do noso centro achegáronnos cantos de arrolos, trabalinguas, fórmulas de xogo, adiviñas... Creamos con elas uns códigos QR e expóñense nas entradas do centro para que a comunidade educativa os poida escoitar.

Códigos QR

Tradidácticos

Este proxecto ten a finalidade de achegar a tradición ao alumnado do noso país, a través do baile, o canto, os contos e a práctica dos instrumentos máis característicos da nosa música.

Creado por Manuele Pardo, graduado en Maxisterio dende 2017, quen traballa como mestre de música en colexios ao ancho da xeografía galega dende o 2018 ata o 2023.

Na actualidade forma parte de grupos como AILÁ, A Banda das Crechas ou Os Estalotes, todos eles vencellados á música tradicional. Tamén imparte aulas de pandeireta, gaita, percusión e baile a crianzas e adultos en diferentes asociacións culturais.

Encontros lectores

 O 12 e marzo, o Equipo de Biblioteca en colaboración co EDLG, desenvolveu un novo encontro lector, as lecturas que comentamos foron as seguintes:

1. Lectoras e lectores principiantes

CANTA XENTE SE NECESITA..., de Anna Font 

2. Lectoras e lectores autónomos e autónomas

ESPANTALLO AMIGO, de Xosé Neira Vilas

3. Familias lectoras

VIRTUDES (e misterios), de Xesús Fraga

"A investigación cambia o mundo". A ciencia feita en Galicia.

O alumnado de 6º de Educación Primaria do noso centro tivo a sorte de recibir a visita de María de la Fuente Freire, recoñecida investigadora galega, que compartiu con nós unha charla apaixonante sobre a ciencia feita en Galicia.

Cun título tan evocador como “A investigación cambia o mundo”, María falounos da súa experiencia como científica, explicando que a investigación é unha ferramenta fundamental para mellorar a nosa sociedade, e que tamén é unha viaxe chea de preguntas, descubrimentos e aprendizaxe constante. Animou ao alumnado a manter a curiosidade, a facerse preguntas e a non ter medo a explorar novos camiños.

Un dos puntos máis destacados da charla foi a reflexión sobre a igualdade na ciencia. María recalcou que se pode facer ciencia en galego e en feminino e que, aínda que se conseguiron algúns avances, queda moito camiño que percorrer para que todas as persoas teñan as mesmas oportunidades no mundo da investigación, independentemente do seu xénero. Por iso, convidounos a loitar contra os estereotipos e a crer nas nosas capacidades, xa que, a ciencia necesita de todas e todos.