Falemos de bo trato para conmemorar o 8M

Este vídeo, que é o resultado do traballo do alumnado que agora está en 3º de Primaria. É froito dunha ampla proposta que se empezara en Educación Infantil e que tivo unha breve continuación, debido á pandemia, cando estaban en 1º. 

Estas nenas e estes nenos achégannos, en galego, unhas regras básicas do Bo Trato. Falan de diversidade, de tolerancia, de igualdade, de entendemento, de respecto, de cooperación e de manexo adecuado dos conflitos. Aspectos básicos da xornada reivindicativa do 8 de marzo.

Música para un tempo de Paz

O alumnado de Infantil e o alumnado de 3º, 5º e 6º de Primaria, do CEIP López Ferreiro, desenvolven un traballo conxunto de achegamento a temas musicais en inglés, con pequenos fragmentos traducidos ao galego que nos permiten expresar e transmitir sentimentos de optimismo e esperanza nuns tempos difíciles para a paz.

Neste traballo colaboraron co EDLG as titoras de 6º de Educación Infantil e os e as docentes de inglés, dende o seu programa das Seccións Bilingües.

 

XOIAS DA TRADICIÓN ORAL

Dúas familias da nosa comunidade educativa achégannos dúas testemuñas marabillosas da recollida de tradición oral.

A primeira son dúas gravacións, realizadas hai máis de vinte anos, que conforman un episodio dunha serie denominada A Palabra no Tempo, da TVG.

Sara achéganos a historias e lendas que deron forma ao imaxinario do Mar das Carolas (na Mariña lucense) e que grazas a ela se conservaron.

Moitísimas grazas á familia Rodríguez Domínguez por cedernos este tesouro.

 

 

A segunda é un libro fantástico elaborado, hai máis de 30 anos (curso 1989-1990) polo alumnado que remataba o ensino obrigatorio no que era o C.P. de Bembibre, en Val do Dubra (hoxe CPI de Bembibre). 

Nel o alumando recolleu, documentou e ilustrou os contos que chegaron ás súas casas. Moitos son de parroquias do propio concello de Val do Dubra e outros de concellos próximos como Carballo ou Santa Comba.

Moitísimas grazas á familia López Calviño por querer compartir con todas e todos esta xoia.

 

Fai un trato co galego: o mundo do deporte fala galego

 Tres figuras representativas do deporte galego convídannos a falar en galego.

Cecilia Cacheda González é xogadora profesional na máxima categoría do balonmán español, no Unicaja Banco Gijón. Foi tamén xogadora do Balonmán Lalín e do Club Balonmán Porriño. Xoga habitualmente coa selección galega e estivo convocada coa selección española absoluta.

Álvaro Casas Rancaño é xogador de fútbol, na actualidade capitán da SD Compostela. Este compostelán xogou tamén no Real Club Celta de Vigo e o Real Oviedo, entre outros.

Pablo Cacheda González foi xogador profesional de balonmán en equipos como Academia Octavio de Vigo, Club Balonmano Valladolid ou Club Balonmano Logroño La Rioja. Foi campión europeo e subcampión mundial júnior, ademais de internacional coa selección absoluta. Na actualidade é técnico do Balonmán Lalín na división de honor prata masculina.

LIBRO DA MEMORIA

Achegámosvos o Libro da Memoria do CEIP López Ferreiro, un Libro amplo, distribuído por cursos, que elaboramos coas achegas da nosa comunidade educativa. 

A tradición oral é un dos piares da nosa cultura, unha memoria colectiva necesaria para manter a identidade propia. 

Agradecemos a participación de todas e todos para conformar este traballo. Premede nas imaxes e desfrutade!                                                              

                                            

  

                                

                               

        j           

                                                                                      

Fai un trato co galego: a nosa música

Algunhas das artistas máis coñecidas no mundo da música en galego, de todas as idades, pídennos que fagamos un trato co galego.

As Tanxugueiras rompen coas estatísticas que sinalaban que os nenos e nenas non escoitaban nin coñecían música en galego e, unha vez máis, axudan a que a nosa comunidade educativa poña en valor a utilización do noso idioma.

Malvela son o exemplo de mantemento da identidade a través da memoria colectiva, demostrando que nin a lingua nin a idade teñen fronteiras.

Uxía, que ten dirixido e traballado coas mulleres dos dous grupos anteriores, é unha das grandes renovadoras da música tradicional galega e unha das figuras máis significativas da nosa música. 

Nelas temos a reivindicación, a defensa da lingua e o orgullo da cultura galega.

Por todo iso e pola vosa colaboración coa nosa proposta, mil grazas!!!

Fai un trato co galego: o mundo do xornalismo fala galego

 Hoxe iniciamos a nosa campaña: FAI UN TRATO CO GALEGO!

Un proxecto que quere pór en valor o noso idioma e amosar que o galego é unha lingua útil e válida en calquera ámbito. Comezamos co eido xornalístico.

Queremos que o noso alumnado aprecie a nosa lingua propia e coñeza moitas persoas, para as que o uso do idioma galego é algo natural e enriquecedor na súa vida cotiá.

No Equipo de Dinamización da Lingua Galega do CEIP López Ferreiro, estamos moi contentas de que esta proposta comezase a andar e queremos agradecer que tantas persoas, coñecidas e recoñecidas, se sumen á nosa iniciativa.

Irene Lourido é xornalista, profesora universitaria e presentadora da TVG. Leva xa varios anos á fronte dos informativos da fin de semana da TVG. Terio Carrera tamén é presentador da TVG, onde é un dos rostros máis coñecidos na información deportiva. Xavier Cea é subdirector do xornal compostelán El Correo Gallego. Leva moitos anos no mundo do xornalismo, desempeñando outros cargos como a dirección de Galicia Hoxe e a presidencia da Asociación de Medios Escritos en Galego.

 

 En próximas entradas moita outra xente vos pedirá que fagades un trato co galego!