25N-Adhara e Ritman

Queremos achegarvos unha das actividades que desenvolvemos para pór de manifesto o noso rexeitamento á violencia contra as mulleres.

Son as nenas e os nenos da Aula Coralia (6º de Educación Infantil, B) que fan a súa propia versión de Libre Son, de Adhara e Ritman.

Este alumnado tivo a sorte de recibir resposta da cantante. Mil grazas, Adhara!

 

Tanxugueiras

Neste mes de novembro, queremos agradecer ao Concello de Santiago e concretamente á Concellaría Delegada de Normalización Lingüística, que o alumnado de 4º de Educación Primaria do noso centro, puidera desfrutar da visita e da actuación de Olaia, Aida e Sabela, Tanxugueiras!

Pensamos que son unhas das grandes expoñentes da posta en valor e da reinterpretación da nosa tradición oral.

Visita ao Museo do Pobo Galego

 

O pasado xoves, día 18 de novembro, os Equipos de Biblioteca e de Dinamización da Lingua Galega desenvolveron unha actividade coas familias no Museo do Pobo Galego. Esta proposta dá inicio ás actividades do club de lectura do centro deste curso 2021/2022.

Participamos nun itinerario sonoro polas salas do Museo. Este itinerario, Son[Em]peza, que poderá visitarse ata finais de ano, quere dar a coñecer as pezas materiais (obxectos) e as pezas inmateriais (sonoras) que posúen nos arquivos do Museo.

Achegámonos a cantigas, refráns, ditos... que conforman e poñen en valor a nosa memoria colectiva e a cultura que nos é propia. 

 

 

Xogos tradicionais galegos

 

O Consello da Cultura Galega colabora co Observatorio do Patrimonio Lúdico Galego e preséntannos a través dunha web e dunha app a posibilidade de acceder ao patrimonio, tanto material como inmaterial, que nos proporcionan os xogos tradicionais.

Paco Veiga (profesor de Lingua Galega e Literatura, fundador da Asociación Galega do Xogo Popular e Tradicional e representante do Observatorio do Patrimonio Lúdico Galego) sinala que “o xogo popular é unha parte fundamental da cultura do noso país”.

Pensamos que é todo un acerto o achegamento a través de ferramentas tecnolóxicas, que permiten acceder aos xogos facilmente e nun breve espazo de tempo.

Animádevos a xogar! Xogade en galego!

http://xogostradicionais.consellodacultura.gal/

 

 

Intercambio de cartas

  Estase a levar a cabo no centro unha proposta de intercambio de cartas con outros centros: CEIP Sal Lence de A Coruña e CEIP Santa María do Castro de Cabo de Cruz. Este  intercambio de cartas persegue non só fomentar o uso do galego e promover a competencia lingüística na nosa lingua, senón tamén establecer lazos entre alumnas e alumnos doutros centros galegos. 

Libro da Memoria

Queremos conformar un Libro da Memoria do centro. Parécenos moi importante que o alumnado  comparta e desfrute da tradición oral propia. Pensamos que é responsabilidade do sistema educativo asumir, pór en valor, analizar e perpetuar os sinais de identidade de cada pobo.

Achegámosvos un exemplo de xogo de aula en Educación  Infantil e nesta entrada poderedes ver máis adiante o Libro que, entre todas e todos, elaboraremos este curso.

 

Tamén podedes acceder a textos de tradición oral trasladados a ARASAAC a través do seguinte enlace.